Umsóknareyðublað

Umsóknareyðublað fyrir styrki til endurheimtar votlendis má finna á þessum tengli: umsoknareydublad.doc

Auðlind-Náttúrusjóður auglýsir eftir umsóknum um styrki úr sjóðnum fyrir árið 2011

Auglýst er eftir umsóknum um styrki fyrir verkefni sem tengjast endurheimt votlendis. Hámarksfjárhæð styrkja fyrir hvert verkefni er kr 500.000. Upphæð styrks getur numið allt að 50% hluta kostnaðar við vinnu, tæki og kaup á aðföngum. Einungis verður tekið við umsóknum á þar til gerðum eyðublöðum, sem finna má á vefsíðu Auðlindar, www.audlind.org. Á vefsíðunni má einnig finna úthlutunarreglur sjóðsins. Umsóknafrestur er til og með 30. mars 2011. Umsóknir skal senda á Auðlind-Náttúrusjóð, Stokkseyrarsel, 801 Selfoss. ATH, umsóknareyðublaðið kemur til með að birtast á forsíðu vefsins á næstu dögum! Fyrirspurnum má beina á netfangið audlind@audlind.org og raga@nett.is

Alþjóðlegur votlendisdagur 2. febrúar

Alþjóðlegi votlendisdagurinn er 2. febrúar ár hvert. Ramsarsamningurinn um votlendi var undirritaður þennan dag árið 1971 í írönsku borginni Ramsar. Nú eru 160 ríki aðilar að samningnum og 1.912 votlendissvæði hafa verið friðuð samkvæmt honum. Alls hafa verið friðaðir með þessum hætti 186963216 ha votlendis. Ísland gerðist aðili að samningnum árið 1977 og fljótlega voru þrjú Ramsarsvæði tilnefnd hér á landi; Þjórsárver, Grunnafjörður og Mývatn og Laxá. Þann 2. febrúar 2011 var loksins 4. íslenska svæðið tekið inn á Ramsarskrána, en það er votlendið í Andakíl í Borgarfirði. Þjórsárver, eitt af fjórum Ramsarsvæðum á Íslandi. Ljósmyndari: Jóhann Ísberg.

Endurheimt votlendis í Friðlandinu í Flóa lokið

Endurheimt votlendis í Friðlandinu í Flóa er lauk í ágúst 2010. Með styrk frá Auðlind var fyllt upp í 730 m langan skurð sem liggur um miðbik friðlandsins við austurbakka Ölfusár. Fuglavernd hefur haft umsjón með svæðinu síðan 1997 og hefur nú náð því markmiði að færa votlendi á stórum hluta af 5 ferkílómetra friðlandinu í upprunalegt horf. Þar að auki hefur félagið byggt upp myndarlega aðstöðu til fuglaskoðunar með hjólastólaaðgengi. Sjá nánar á Friðland í Flóa og á vef Fuglaverndar Fuglavernd Unnið að endurheimt votlendis í Friðlandinu í Flóa

Endurheimt votlendis í landi Setbergs í Litla-Langadal á Skarðsströnd lokið

Nú er að mestu lokið framkvæmdum við endurheimt votlendis í landi Setbergs í Litla-Langadal, sem styrkt var af Auðlind sumarið 2010. Um 2 km af skurðum voru fylltir með jarðvegi og nýttust til þess gamlir uppmoksturshraukar. Umsjónarmenn svæðisins munu fylgjast með hvernig framvindan verður í vetur og hvort eitthvað þurfi að bæta og breyta. Framtíðaráform eru uppi um að auðkenna svæðið með skilti svo og að velja, merkja og útbúa gönguleiðir á góða útsýnisstaði. Ef til vill væri viðeigandi að koma upp einhverskonar skjóli til fuglaskoðunar. Þá þarf á einum stað að brúa skurð. Sjá nánar um endurheimtina á Setbergi á Setberg Skurðstæði í landi Setbergs að vatnsmettast eftir að skurður var fylltur með jarðvegi